Koekeloerder — 15 September 2017

Beste Redakteur en Kollega
Ek sit en wonder of mens moet skaterlag of tjank oor mense wat ander mense onderskat. Ja, Mevrou, ek sit en hou nabetragting oor die hoogbetaalde amptenaar wat ons kom sien het.
Ons verstaan daar is drie dinge wat belangrik is naamlik bestuur, opleiding en samewerking, maar die heel belangrikste (het ons nou geleer) is om altyd twee selfone uit te pak en jouself van die een na die ander te bel as strikvrae gevra word. Moet ons lag of moet ons huil dat die persoon dit twee keer doen en nie besef kringtelevisiekameras …
Soms is die Engelse ons een vooruit met die skep van nuwe woorde en die modewoord blesser (let daarop die woord het nie noodwendig ʼn seksuele konnotasie nie) is ‘n goeie voorbeeld. ’n Blesser is nie sommer net ‘n rykerige man wat ‘n jong vrou met oorvloedige geskenke oorlaai nie. Néé, ’n blesser is ryker en invloedryker as ’n sugar daddy en kan jou stuur tot na die dure Doebai.
Ek volg die afgelope tyd taalgroepe se redenasies oor wat’ ’n blesser in Afrikaans is. Niemand kon tot op hede met ’n Afrikaanse ekwivalent kom wat nie simpel klink nie en daar tref ‘n Sondagkoerant toe die naweek met blesser. Ja, blesser word kursief geskryf om aan te dui dit is geleen. In die proses dink ek aan ‘n plasing op my eie Facebook-blad net ‘n dag voor die Sondagkoerant verskyn het:
“Ek heupswaai soos Elvis ‘All Shook Up’ en wonder my moeg oor die nuwe modewoord ‘blesser’ waarvoor almal ‘n Afrikaanse woord voor soek. Ek heupswaai en dink: bless my soul what’s wrong with me?”
Mevrou, ek sit op my stoel en wonder wat dink jy oor die amptenaar se kennis van bestuur, opleiding en samewerking wat vaardig twee selfone gelyktydig bless?
— Elsa

Leave a Reply

This site uses Akismet to reduce spam. Learn how your comment data is processed.