Koekeloerder – 22 April 2016

Beste redakteur en kollega
Ek sit op my stoel en lees na oor dieregeluide.
‘n Aap blaf, akkedisse piep, bobbejane blaf of bôgom, ‘n duif kan koer, kir of roekoek, ‘n gans gaggel, snater of blaas, kalkoene koel-koel (Beter Afrikaans sê ook so), katvisse blaas, kraaie kras of krys, makoue blaas, ratel of snuif, volstruise brom, wildeganse gier en wildsbokke proes. Ek sit en lag oor ‘n kangaroe hoes en wonder hoeveel mense weet dit?
‘n Klompie versamelname sit my ook onder soos al die blare van ‘n plant wat gebladerte genoem word en ‘n versameling sterre wat ‘n gesternte is. ‘n Veragtelike klomp mense saam – wat ‘n gebroedsel genoem word – klink kras.
Ander versamelname het ek al vergeet (indien ek dit wel geleer het) soos eskadrielje: ‘n aantal vliegtuie (gewoonlik vyf) in groepsverband. ‘n Groep duikbote of oorlogskepe wat ‘n flottielje genoem word en ‘n groep wat met geweld ‘n staatsgreep uitvoer is ‘n junta.
Ek vra vir ‘n kollega wat is ‘n gekastreerde haan en sy sê sy glo nie daar kan so ‘n ingewikkelde prosedure op ‘n haantjie uitgevoer word nie. Vir dié wat nie weet nie, dit word ‘n kapoen (wat eerder klink na ‘n kleur tussen kakie en pampoen) genoem en dan word hulle blykbaar vinniger vet vir die pot.
Mevrou, dink jy nie ook dat ‘n kalkoen eerder koeloe-koeloe nie? Maar as die aap BLAF is niks seker onmoontlik nie?
— Elsa

Leave a Reply

This site uses Akismet to reduce spam. Learn how your comment data is processed.