Koekeloerder – 4 Maart 2016

Beste redakteur en kollega
Ek sit en lees by Wiktionary.org die woord “kakorrhaphiophobia”. Dit is ‘n abnormale vrees om te faal of te verloor. Dit verskyn ook in die internetwoordeboeke wat ek geraadpleeg het soos urbandictionary.com en merriam-webster.com. Dit is ook opgeneem by fobielyste (phobiasource.com en ander).
Ek misluk toe in my soeke na die Afrikaanse vertaling van kakorrhaphiophobia. Ek tongstruikel ook as ek die woord probeer uitspreek en as ek dit vinnig agtermekaar moet herhaal gaan ek in die sop land.
As ‘n soort vrees so ‘n vreeslike woord het wonder ek wat sal die groot woord wees vir ‘n vrees dat jou geld rommelstatus kan bereik.
Van woorde gepraat, ek het stil geraak toe ek hoor die taalkenner prof Anton F Prinsloo is oorlede. Ek is in besit van sekere van sy werke soos Pharos se Bygelowe en waar hulle vandaan kom, Spreekwoorde en waar hulle vandaan kom en ‘n Dief aan die kers: skelm woorde deur die eeue. As ek my gedagtes inspan kan ek ook Die Aap in jou koffie, 13 Klutse kwyt en Annerlike Afrikaans in my boekkas by die huis ‘sien’.
Prof Prinsloo het aan my woordeboekverslawing (moet asseblief nie hiervoor ‘n fobienaam uitdink nie my boekie is reeds te vol) ‘n ander dimensie gegee. ‘n Vrek lekker dimensie want taal is nie net ernstig nie. Néé, taal praat die taal wat ons hom wil laat praat.
Mevrou, as jy my rubriek ‘uitgooi’ hanteer net asseblief my “kakorrhaphiophobia” met handskoene. Sagte handskoene – anders gaan ek grens!

Leave a Reply

This site uses Akismet to reduce spam. Learn how your comment data is processed.